Die Simbole

‘n Algemene misverstand is dat oom Nicolaas nooit sy visioene self verklaar het nie. Dit is nie waar nie. In sy latere jare het hy egter opgehou om met buitestanders oor sy visioene te praat en het slegs vir sy dogter, Anna, en ‘n paar naaste vriende verklarings gegee.

Hy was ‘n teruggetrokke persoon en het nooit self sy visioene neergeskryf nie, behalwe deur sy dogter Anna. Gelukkig het verskeie persone, soos Magdalena Bouwer, Polly, Ria James, Boy Musman, Joos Haasbroek en Paul Prinsloo, baie van sy visioene bewaar en verduidelik.

Oom Nicolaas het vir ons die betekenis van die simbole gegee en ‘n groot aantal van sy visioene self verklaar. Met behulp van hierdie simbole kon ons oor die jare meer as ‘n honderd van sy visioene hermeneuties ontsyfer, waarvan baie reeds vervul is.

Hieronder is ‘n voorbeeld van hoe een van die visioene uitgelê kan word:

Toe staan ek op mij kierrie en onderaan die kierrie spring een bloed aardjie oop, en die bloed loop op die grond en op mij veldskoen. Toe gaan een zinkplaat van die balk af, en toe zien ek die lug. Toe gaan die zinkplaat weer op die balk en toe is die huis z’n mure hoog. — 8 Julie 1919

Hierdie profesie oor die sluipmoord op dr. Verwoerd is een van Siener van Rensburg se belangrikste gesigte oor die verloop van die Boervolk se geskiedenis. Dit dui op die traumatiese einde van ‘n era en die begin van ‘n tydperk van onstabiliteit en verandering.

Simbole in die visioen:

• Kierie: ‘n Wapen en ‘n vertroueling.
• Bloedaartjie: Geweld.
• Veldskoen: Boere-regeringshoof.
• Sinkplaat, balk, lug, mure: Politieke veranderinge.

Op 6 September 1966 het Dimitrio Tsafendas dr. H.F. Verwoerd in die Raadsaal van die parlementsgebou doodgesteek. Siener se gesig dui daarop dat die sluipmoord vooraf beplan was en moontlik ‘n vertroueling betrokke was: “…onderaan die kierie spring ‘n bloedaar oop en die bloed loop op die grond en op my veldskoen.”

Na dr. Verwoerd se dood het dinge verander (sinkplaat van die balk af). Die Nasionale Party het sy beleidsgrense verander en wegbeweeg van apartheid (sien die lug). Later het hulle probeer terugkeer na die ou weë (sinkplaat weer op die balk), maar die veranderinge was onherroeplik en die parlement het ander groepe ingesluit (die huis se mure hoog).

(Interessant genoeg is die Boereregering nou deur ‘n sinkdak verteenwoordig, nie meer ‘n grasdakhuis nie, wat ‘n metamorfose en ontbinding aandui soos met Jan Smuts en Louis Botha).

Simbole